Аракел (Arakhel)
Центри за поддршка против родово базирано насилство за жени Ромки
Проектот Аракел има за цел да ги унапреди знаењата и вештините на ромските медијатори за поддршка на жртви, да ја зголеми свесноста и да обезбеди информации за жените Ромки кои се жртви на родово базирано насилство, како и да развие нови услуги и алатки прилагодени на потребите на жените Ромки кои преживеале или се жртви на родово базирано насилство.
Поконкретно, проектот Аракел има за цел да одговори на следните недостатоци и потреби:
- Недоволна достапност и ограничен пристап до сеопфатни, насочени услуги за заштита и специјализирана поддршка за жени Ромки жртви на родово базирано насилство и семејно насилство.
- Ограничени вештини на ромските (здравствени и други) медијатори во областа на поддршката на жртви и подигањето на свеста за пристап до услуги за заштита и поддршка.
- Недоволна информираност и пристап до информации кај жените Ромки кои се жртви (или потенцијални жртви) на родово базирано и семејно насилство во врска со нивните права и достапната поддршка, како и недоверба кон давателите на услуги.
- Потреба од предизвикување и промена на постојните патријархални норми, ставови и стереотипи, како и ниското ниво на свесност во ромските заедници кое придонесува за прифаќање на насилството врз жените и ограничено разбирање на различните форми на насилство.
Специфични цели на проектот
Проектот Аракел има за цел да:
- Ја подобри достапноста и пристапот до услуги за заштита и специјализирана поддршка за жени Ромки жртви на родово базирано и семејно насилство во Грција, Романија, Србија, Северна Македонија и Босна и Херцеговина.
- Ги унапреди вештините на најмалку 100 ромски (здравствени и други) медијатори за поддршка на жртви и подигање на свеста, овозможувајќи им да го промовираат пристапот до услуги за заштита и поддршка како „медијатори за родово базирано насилство“.
- Ја зголеми информираноста и пристапот до информации кај жените Ромки жртви (и потенцијални жртви) на родово базирано и семејно насилство за нивните права и достапната поддршка, како и да ја зајакне нивната доверба во институциите и давателите на услуги.
- Придонесе кон промена на постојните патријархални норми, ставови и стереотипи и подигнување на свеста во ромските заедници за неприфатливоста на насилството врз жените и различните форми што тоа може да ги има.
- Ја зајакне свесноста кај релевантните креатори на политики и локалните и националните власти за специфичните потреби од заштита на жените Ромки жртви на родово базирано и семејно насилство и да поттикне вклучување на предложените решенија во јавните политики.
Активности на проектот
Целите на проектот Аракел ќе се постигнат преку следните активности:
Размена на искуства и добри практики
Ова вклучува мапирање и анализа на постојните модели и услуги за поддршка и заштита на жени Ромки жртви на родово базирано насилство во петте партнерски земји, како и организирање онлајн работилници за учење и размена на искуства.
Обука на ромски медијатори за родово базирано насилство
Ќе биде развиена и спроведена програма за обука според моделот „обука на обучувачи“, со цел да се изградат капацитетите на најмалку 100 ромски медијатори кои ќе дејствуваат како „ромски медијатори за родово базирано насилство“ во своите заедници и ќе ја водат работата на локалните центри за поддршка.
Воспоставување и функционирање на центри за поддршка против родово базирано насилство
Ќе бидат отворени нови центри во Грција, Романија, Србија и Босна и Херцеговина, додека услугите на постоечкиот центар „Иси Арка“ во Шуто Оризари ќе бидат подобрени и дополнително проширени.
Активности за подигање на свеста
Преку настани, онлајн кампањи и информативни и мултимедијални материјали ќе се подигнува свеста кај жените Ромки жртви (и потенцијални жртви) на насилство за нивните права и достапната поддршка, ќе се намалува стигмата и ќе се предизвикуваат патријархалните норми, ставови и стереотипи во ромските заедници.
Целни групи
Главните целни групи на проектот Аракел се:
- Ромски (здравствени и други) медијатори како „медијатори за родово базирано насилство“
- Жени Ромки жртви на родово базирано и семејно насилство
- Ромски заедници (жени и мажи)
- Релевантни креатори на политики и локални и национални власти.
Партнери на проектот
Проектот „ARAKHEL – Центри за поддршка на Ромки жртви на родово базирано насилство“ се спроведува во пет европски земји – Грција, Северна Македонија, Србија, Босна и Херцеговина и Романија. Проектот го реализира конзорциум од шест партнерски организации, кои имаат долгогодишно искуство во областа на заштитата на човековите права, унапредувањето на положбата на Ромите, родовата еднаквост и борбата против родово базираното насилство.
Координатор на проектот е организацијата SYMPLEXIS од Грција, а партнерски организации се Иницијатива за правата на жените од Шуто Оризари и Ромски ресурсен центар од Северна Македонија, Roma Women’s Center BIBIJA од Србија, Udruženje žena Romkinja „Bolja Budućnost“ од Босна и Херцеговина и SASTIPEN – Центар за здравствени политики на Ромите од Романија.
Преку меѓусебна соработка, размена на искуства и заеднички активности, партнерите работат на зајакнување на системите за упатување и поддршка на Ромките жртви на родово базирано насилство, подобрување на пристапот до специјализирани услуги, јакнење на капацитетите на професионалците и ромските медијатори, како и унапредување на меѓуинституционалната соработка во сите земји партнери.
